ކޮމަންވެލްތަށް ސިޓީ ފޮނުވަނީ އެމީހުންގެ މަންދޫބު ރާއްޖެވަޑައިގެން ދެއްކެވި ވާހަކަތަކާ ބަޔާނާ ދިމާނުވާތީ: ސަރުކާރުގެ ތަރުޖަމާން

މިމަހުގެ ސޯޅަވަނަ ދުވަހު ކޮމަންވެލްތްގެ މިނިސްޓީރިއަލް އެކްޝަން ގުރޫޕް (ސީމެގް) އިން ނެރުނު ބަޔާނުގައި ބުނެފައިވާ ވާހަކަތައް އޮޅުންފިލުވުމަށް ސީމެގަށް ސިޓީއެއް ފޮނުވަން ސަރުކާރުން ނިންމީ ކޮމަންވެލްތުން ރާއްޖެއަށް ކަނޑައެޅުއްވި މަންދޫބު ޑޮނަލްޑް މެކެނަން ރާއްޖެވަޑައިގެން ދެއްކެވި ވާހަކަފުޅާ ސީމެގްގެ ބަޔާނާ ފުށުއެރުންތަކެއް ހުރުމުން ކަމަށް ރައީސް ވަހީދުގެ ތަރުޖަމާނު އައްބާސް އާދިލް ރިޒާ ވިދާޅުވެއްޖެއެވެ. 
އައްބާސް ވިދާޅުވީ ސީމެގަކީ ގައުމުތަކުގެ ޤާނޫނު އަސާސީ ދެމެހެއްޓުމަށް މަސައްކަތްކުރަންޖެހޭ ބަޔެއްކަމަށާ، މިހާރު އޮތް ބާޣީ ސަރުކާރު ދިވެހި ޤާނޫނު އަސާސީއާއި ހިލާފްވެފައި ނުވާނެކަމަށެވެ. 
” ސީމެގް ބަޔާނަކުން ނުފެނޭ ސަރުކާރު ހިލާފްވެފައިވާ ގާނޫނުއަސާސީގެ އެއްވެސް މާއްދާއެއް. އަދި އެބަޔާނަކުން އެމީހުން ބޭނުންވާ ގޮތް ސާފެއް ނުވޭ. ޑޮނަލްޑް މެކެނަން ރާއްޖެއައިސް ސަރުކާރާއެކު ދެކެވުނު ވާހަކަތަކާ ހިލާފް އުޅޭތީ ސިޓީ ފޮނުވަންޖެހޭ. އަޅުގަނޑުމެން ފޮރިންގ މިނިސްޓްރީ މެދުވެރިކޮށް މިދެންނެވި ސިޓީ ފޮނުވާނީ ” ރިޒާ ވިދާޅުވިއެވެ. 
މިކަމާ ގުޅޭގޮތުން ކުރީގެ ފޮރިންގމިނިސްޓަރ އަދި އދ. އިން އީރާނަށް ކަނޑައަޅުއްވާފައިވާ ރެޕަޓުއާ ޑރ. އަހުމަދު ސަހީދު ވިދާޅުވީ ކޮމަންވެލްތައް ސިޓީވެސް ފޮނުވާނަމަ ފޮނުވަންވީ ކަމަށާ، ފޮނުވުމުން ސިޓީގެ ޖަވާބުވެސް ކޮމަންވެލްތުން ދެއްވާނެ ކަމަށެވެ. 
” މިސާލަކަށް އެމީހުން ކުރަންއުޅޭ ސުވާލަކީ މަރުވީ ރަންގެރިއެއްތޯ؟ ފައިހުރި ގެރިއެއްތޯ؟ ފަލަ ގެރިއެއްތޯ؟ މިކަހަލަ ސުވާލުތަކެއް. މިސަރުކާރުން އަބަދުވެސް މިފެންނަނީ ރާއްޖޭން ބޭރުގެ ފަރާތްތަކުން ވިދާޅުވާ އެއްޗެއް ނޭންގޭ ކަމަށް ހަދާތަން. ބަޔަކު ކައިރީ އަހާލައިގެން ނޫނީ އެއްޗެއް ސާފުނުވާތަން. ބައްލަވާ ވަހީދުގެ ހާޑްޓޯކުގައި ސުވާލުކުރުމުން ވިދާޅުވަނީ ތިޔަ ސުވާލަށް ޖަވާބުދެވޭނީ ބަޔަކު ކައިރިން އަހާލައިފަޔޭ. އެންމެފަހުން ސުވާލުކުރި މީހާ ބުނަންޖެހުނީ ރައީސަކަށް ވާތީ ކޮންމެސް ވަރެއްގެ ލީޑަރސިޕެއް ދައްކާށޭ” ޝަހީދު ވިދާޅުވިއެވެ. 

ސީމެގުން މިމަހުގެ 16 ވަނަ ދުވަހު ނެރުނު ބަޔާނުގައި ނެޝަނަލް އިންކުއަރީ ކޮމިޝަން 4 ހަފްތާތެރޭގައި އަލުން އެކުލަވައި ނުލައިފިނަމަ ކަންކުރާނެ އުސޫލާއި ބެހޭ ގޮތުން ބުނެފައިވަނީ” ކުރިއަށް އޮތް 4 ހަފްތާގެ މުހުލަތުގައި އެކޮމިޝަން އެކުލަވާލެވިފައިވާގޮތް ބަދަލުކޮށް، އެކޮމިޝަނުގެ މަސްޢޫލިއްޔަތާއި އިޙްތިސާސް އާންމުކޮށް ބަލައިގަނެ ޤަބޫލުކުރެވޭނޭ މިންގަނޑަކަށް އިސްލާހު ނުކުރެވިއްޖެނަމަ، މިހާރު ދިވެހިރާއްޖެ އާމެދު އެޅިފައިވާ ފިޔަވަޅު ތަކުގެ މައްޗަށް އިތުރު، ހަރުކަށި، ފިޔަވަޅުތައް އެޅުމަށް ސީމެގަށް މަޖުބޫރުވާނޭ ކަމަށް، ސީމެގުން ބުނަމެވެ” މިހެންނެވެ.